११ बैशाख, जनकपुरधाम । राष्ट्रपति डा. रामवरण यादवले द्वन्द्वकालमा कब्जा गरेको सम्पत्ति फिर्ता अझै नभएकोमा असन्तुष्टि जनाउनु भएको छ ।  पैत्रिक गाउँ सपहीमा रहेका राष्ट्रपतिले अनलाइनखबरसँग कुरा गर्दै लडाकूहरु ब्यारेक छिरे पनि शान्ति प्रक्रियाले पूर्णता पाउन नसकेको बताउनु भयो ।

‘लडाकूहरु व्यारेक छिरेपनि शान्ति प्रक्रिया पूरा भएको छैन’ उहाँले भन्नुभयो-’कब्जासम्पत्ति फिर्ता लगायतका काम अझै भएका छैनन् ।’ शान्ति प्रक्रियाले पूर्णता नपाएसम्म विकास हुन नसक्ने र मुलुकमा स्थिरतासमेत नहुने उहाँको भनाई थियो ।

राष्ट्रपति यादवले वर्तमान सरकारको प्रमुख दायित्य असन्तुष्ट दललाई सहमतिमा ल्याएर चुनाव गराउने भएको पनि बताउनु भयो । जनताले चुनाव होस, शान्ति होस र विकास होस भन्ने चाहेको राष्ट्रपतिले बताउनुभयो ।

यसअघि नेपाली कांग्रेस र एमाले लगायतका दलहरुले द्वन्द्वकालमा कब्जा गरिएका घरजग्गा फिर्ताको एजेण्डा उठाउँदै आएका थिए । कब्जा सम्पत्तिको कुरा उठाएर राष्ट्रपतिले शान्ति प्रकृया सकिन बाँकी रहेको बताए पनि बेपत्ता खोजविन र सत्य निरुपण आयोगका बिषयमा भने केही टिप्पणी गर्नुभएन् ।