जनताले खोजेजस्तो नयाँ संविधान बन्यो भने मात्र लोकतन्त्रको उपलव्धी संस्थागत हुन सक्ने उनको भनाई छ । ‘जे भयो भयो, अब छिटो चुनाव गरेर संविधान बनाउनुपर्छ’ रुविनले भने ।

जनआन्दोलनको बेला रुविनको दैनिकी नै सडकमा बित्थ्यो । ‘बिहान उठ्ने बित्तिकै सारँगी बोकेर आन्दोलनकारीको हुलमा मिसिने, सुरिलो भाकामा गीत गाउने, अनि रात परेपछि घर र्फकने, त्यो बेलाको मेरो दैनिकी नै यही थियो’ अनलाइनखबरसितको कुराकानीमा रुविनले भने । हुन पनि रुबिन बिनाको जमघट आन्दोलनकारीलाई पनि खल्लो लाग्थ्यो । रुविनको गीतको चर्चा बढ्दै जाँदा हरेक दिन हरेक ठाउँमा उनको खोजी हुन थाल्यो । दलहरुका संयुक्त र छुट्टाछुट्टै कार्यक्रममा पनि उनले समय दिन थाले । ‘यो पार्टी, त्यो पार्टी भनेर छुट्याईन’ रुविनले भने -’आन्दोलनलाई सहयोग पुग्ने खालका हरेक कार्यक्रममा सहभागी भएर गीत गाएँ ।’

सडकमा आन्दोलनकारीसित मिसिएर शाही शासनको बिरोधमा गीत गाउनु सजिलो काम थिएन । गोली, अश्रुग्याँस, लाठी, लात्ती, थुना र धरपकडको सधैं डर । बिहान उठेर हिंडेपछि बेलुका र्फकने, नर्फकने ठेगान हुन्न थियो । तैपनि रुबिनले यसको रत्तिभर ख्याल गरेनन् । कतिपटक प्रहरीले उनको सारंगी फुटादिए, कतिपट थुनामा पनि लगे । ‘कहिलेकाहीं प्रहरीले माया पनि गर्थे, कहिलेकाहीं चाहिं रीस’ रुविनले सम्झँदै भने -’धेरैपटक अरुसँगै म पनि प्रहरी थुनामा पुगें, तर म सानो देखेर उतिखेरै प्रहरीले छाडिदिन्थ्यो, म फेरि अर्को ठाउँमा पुगेर गीत घन्काउन थालिहाल्थें ।’

त्यतिबेला ५ दलले गर्ने मौसमी आन्दोलन र त्यसपछिको १९ दिने जनआन्दोलन सबैमा रुविन सहभागी भए । उनले हेर्दाहेर्दै मुलुकमा ठूलो परिवर्तन भयो । देशमा लोकतन्त्र हुँदै गणतन्त्र स्थापना भयो । ‘त्योबेलाको उत्साह नै अर्कै थियो’ रुविनले भने -’नेताहरुका प्रतिबद्धता, जाँगर र परिवर्तनको आकांक्षा देखेर म पनि पछि लागेको थिएँ ।’

फेरि पनि नेताहरुको प्रतिबद्धता र जाँगरले मुलुकमा संविधान निर्माण गर्ने रुविनको विश्वास छ ।