११ बैशाख, काठमाडौं । नेपाली राष्ट्रिय क्रिकेट टोलीका कप्तान पारस खड्काले आईसीसी वर्ल्ड क्रिकेट लिग डिभिजन ३ मा नेपाली टोलीको एकमात्र सपना विश्वकप क्रिकेटका लागि छनोट हुनु रहेको बताएका छन् ।

‘हामीलाई थाहा छ, प्रतिस्पर्धी टोलीले हामीलाई खेलका हरेक क्षेत्रमा चुनौति पेश गर्नेछन् र बर्मुडामा आएका सबै टोली क्षमतायुक्त छन्’ इन्टरनेशनल क्रिकेट काउन्सिल आईसीसीसँगको कुराकानीमा खड्काले भनेका छन्-’यहीँ बुझेर हामीले यसलाई निकै गम्भीर रुपमा लिएका छौँ र जितका लागि हरसम्भव प्रयास गर्नेछौँ ।’

आफुहरुलेे प्राप्त श्रोत साधनलाई प्रयोग गर्दै प्रतियोगितामा सफलता प्राप्त गर्न उच्चतम तयारी गरेको पारसको दाबी छ । नेपाली टोलीका सबै सदस्यहरुसँग घरेलु क्रिकेटको अनुभव मात्र रहेको भन्दै उनले आफुहरुले आइसीसीको र्यांकिङमा आउन ठूलो मेहेनत गरेको र विश्व कप क्रिकेटमा छनोट हुनु एकमात्र सपना रहेको बताए ।

‘नेपाली टोली एसोसिएट राष्ट्रहरुमध्ये उत्कृष्ट ६ स्थानसम्म रहन सक्षम रहेको दाबी पारसको रहेको छ । त्यसैले छनोटका लागि हामी आफ्नो अधिकतम क्षमताका साथ खेल्नेछौं’-कप्तान पारस भन्छन् ।

भिसा क्लियरेन्सका कारण रोकिएका नेपाली उपकप्तान ज्ञानेन्द्र मल्लले पनि भिसा पाएका छन् । उनी आज राति दिल्लीबाट लण्डन हुँदै बर्मुडा जाने छन् । नेपाली टोलीका अन्य सदस्य भने लण्डनबाट आज राति बर्मुर्डा जादैछन् । ‘दिल्लीस्थित बेलायती दूताबासले क्लियरेन्स दिएको छ’ क्यानका महासचिव अशोकनाथ प्याकुरेलले अनलाइनखबरसँग भनेे-’उनी आजै लण्डन जानेछन् ।’

नयाँ र पुरानो पासपोर्टमा जन्म मिति फरक परेको भन्दै भारतस्थित बेलायती दूताबासले ज्ञानेन्द्रलाई ट्रान्जिट भिसा दिन मानेको थिएन । जसका कारण उनी टोलीका अन्य सदस्यहरुसँगै जान पाएनन् ।

वैशाख १५ गते डिभिजन ३ को पहिलो खेलमा नेपालले अमेरिकाको सामना गर्नेछ । यो प्रतियोगिता नेपालले सन् २०१५ मा हुने विश्वकप खेल्ने बाटोका रुपमा हेरिएको छ । ६ देशको सहभागिता रहेको प्रतियोगिताको शीर्ष दुई टोली डिभिजन २ मा बढुवा हुनुका साथै १०१४ को विश्वकप छनोट खेलका लागि चयन हुनेछ । उक्त छनोट चरण पार गर्न सके नेपालले विश्वकप मात्र खेल्नेछैन, एक दिवसीय टोलीको मान्यता समेत पाउनेछन् ।