११ बैशाख, काठमाडौं । शुक्र अस्तको कारण धार्मिक काजकर्म नभएरू लामो समय फुर्सदिला रहेका पण्डित/पुरोहितहरु बुधबारदेखि व्यस्त हुन थालेका छन् । यसवर्षको बिहेको लगन शुरु भए लगत्तै उनीहरुलाई भ्याईनभ्याई बनाएको हो । ‘अब पुरोहितहरुका दिन फिरे’ नेपाल पञ्चांग निर्णायक समितिका सदस्य सचिव सूर्यप्रसाद ढुंगेलले अनलाइनखबरसित भन्नुभयो -’यस वर्ष धेरै लगन भएकाले सबै पण्डित/पुरोहितहरु व्यस्त हुने भएका छन् ।’

पण्डित/पुरोहितलाई मात्र होइन निम्ता मान्नेहरुलाई पनि चटारो छ । फागुनमा विवाहको लगन नभएका कारण बैशाखमा धेरैले विहेको तयारी गरेका छन् । एकै दिन धेरै ठाउँबाट निम्ता आउँदा कसकोमा कसरी निम्ता मान्न जाने भनेर निम्तालुहरुलाई समस्या पर्ने गरेको छ ।२०६९ सालमा शुक्र अस्तको कारण जेठ र फागुनमा विवाहको लगन थिएन । विवाहको लगन भएका बैशाख, असार, मंसिर र माघमा पनि थोरै मात्र दिन थिए । बैशाखमा १ दिन, असारमा ४ दिन, मंसिरमा ५ दिन र माघमा १० दिन मात्र लगन हुँदा धेरैतिरको विवाह एकैदिन पर्यो । हुन त लगनबिना विवाह गर्ने चलन पनि छ । तर लगनबिनाको विवाह फाप्दैन भन्ने बुझेकाहरुले लगन नै पर्खन्छन् ।

नयाँ वर्ष २०७० मा विवाह हुने ६ वटै महिनामा प्रशस्त लगन जुरेका छन् । २०६९ सालमा जम्मा २० दिन मात्रै लगन थियो । तर ०७० सालमा भने विवाहको लागि ५२ वटा दिन जुरेका छन् । यसबाहेक दशैंको टीका र श्रीपञ्चमीको दिन लगन नभएपनि विवाह गर्ने चलन छ ।

कुन महिनामा कहिले लगन ?